Pilimon
Selusien koa Helamu ten Pilimon
Isei mutis selusien koanik?
Pol mutis selusien koanik (1:1,9,19) en sua 60 AD en hati avong koa mutis selusien tai va min kristin keil ten taon ten out Kolosi. Pol mul en eim takeih en out Rom (Umen 28:16-31) ka mutis selusien keilu ekek, lingi en hen Taetikas ka Onesimas keke luhekuri luhesani min koakeil ten out Kolosi (Kol 4:7-9).Isei lei usil selusien koanik mulamu?
Pol mutis selusien koanik va min meatin tai en sukul ten out Kolosi, isen Pilimon (1:1). Ven umen koa Pol mumoni en out Kolosi, Pilimon mai vi kristin tai (1:19). Ka Pilimon maen kristin keil alah ruai en teim onen (1:2). Kei vi masta tai koa kur slev keil (slef) amum veni (1:16). Pol mutis selusien koanik min Pilimon keke vakur ris eisisil onen tai, isen Onesimas (1:9-10).Pol mutis selusien koanik vensa?
Pol envati vatie lat sise ten methos onen Kristin keil — Pilimon kilea vo vini eisisil onen, Onesimas, ven koa kei venan tounah tai ka lohosai rani (1:18-19). Ka Pol vis Pilimon houmon methos onen mini (1:9-10). Vis Pilimon houmoni hetahos mini, ka noumontei mun mini nasuval eisisil enges, ka houmon mini suval kei vi tunali tai en Iesu (1:15-16). Hemukonek, ir emun rokilea rovoumon methos min koakeil amumoni tisa minir.Pol envati vatie lati keke rovi vatte tas en meten Ahi — En avong onen Pol, meatin keil koa avi masta ka meatin keil koa avi eisisil one, asakras avalah ruai en out vatas. Ka en Iesu, ir vasi rovi vatte tas (1:1-2, 16,23-24), heisavos keke rovi masta vuo eisisil tai, rovi meatin koa tounah orer houlu vuo livere enges, revi meatin koa tamalikelik vuo taoh, vuo rovi meahos vuo ahin. Veni ir koa romundesin Iesu, rovi vatte tas en meten Ahi.
Pol envati vatie lat sakien ten houhouen — Pol vi mari meatin tai ten sukul ka kei kilea vaselus vakeih min Pilimon keke houmon methos min Onesimas ka nouastei (1:8). Ka ven Pol vouhou min Pilimon, san selusien tetahos mini (1:9,14) ka visi keke houmoni hetahos min Onesimas (1:21). Tahos ir emun rehouhou min meatin sav keil.
Mari rendemien tai ten selusien koanik mul en Pilimon 1:15-16
Nahi Ahi maen Onesimas valohosai ranuk en avong tamure enges, vasakini navong muris, kilea vato vatal minuk lisenges. Ka kosa, kei rovitei eisisil onom enges. !Vuo! Kei tahos muli eisisil tai, kei vi more tumali en isen Iesu. Inau ekvati, ka keik, emhehati mok, veni kei vi eisisil onom ka tumali emun.Asa mul en tus koanik?
1. Pol si houlu ven umen onen Pilimon (1:1-7)2. Pol vis Pilimon houmon methos onen min Onesimas (1:8-25)Philemon
1Inau Pol, namul en eim takeih veni navitehiten more longlongien usil Iesu Kristo.Inau komal tumali Timoti, melviten 'more' minuk, Filimon. Keik kovi more meatin toumien onen Iesu suval komal ka envatien onomal mul enuk. 2Emalvati kihiten 'more' mun min Apia, koa suval ahinkuli orer. Ka kihiten 'more' mun min Akipas, koa mumon umen onen Iesu, suval ir, ka rometautei. Kei suval meatin tavaeen tetahos onen Iesu. Ka 'more' mun min koakeil amusil Ahi koa asukul en teim onom.
3Navisi keke more envatien ka tomat onen Ahi Tamer ka Asuv orer, Iesu Kristo, heto venuk.
Pol Vit Usil Envatien ka Demkatien Onen Filimon
4Tuak Filimon, en hisien vasi keil onak, lises namundem katuk ka namasmas Ahi venuk. 5Navisi mukonek veni nalong usil demkatien onom en Iesu Kristo ka envatien onom koa korie lati min meatin onen Ahi keil. 6Navis Ahi keke navong mihelah ruai, hesakin demkatien onami hekeih imok ka hesakini miheilea revi mok tounah keil tetahos koa vi orer en Iesu Kristo. 7Tuak, envatien onom en meatin sav mul sakinau nasi nau houlu ka mul vou lat rendemien onen meatin keil onen Ahi.Pol Vis Filimon Hekur Revi Eisisil Onen koa Lohosai Rani
8Ven koa komul korie lat envatien min meatin sav, nakilea nihiteni minuk en isen Iesu Kristo keke kumon asa koa tahos koa nihisuk eni. 9Ka nihisuk enges kumoni ven envatien onom. Kokilea keke navi ulmatu tuai ka namules en eim takeih ven isen Iesu Kristo. 10Navisuk en usite onen Onesimas. Kei suval titak veni navong namul en eim takeih, nakatauni votin moulien hau. 11Mulamu, navong lohosai ranuk, kei rotahostei vakataunuk. Ka kosa, kei tahos vakataunuk ka vakataunau mun. ▼12Heisavos ekvat Onesimas houlu mok, nasila vat minuk eris. 13Ekvati mahuli kati vato vakataunau navong namul en eim takeih ven umen usil more longlongien. Hesakini kilea vakur vulum vesesal venau, 14ka ekrovattei moumon etai tounah koa keik kormaentei inau moumoni. !Vuo! Ekvati kumon asa koa keik kos komundemi kovit tahos. Hesakini, kataunien koa kosani minau housil rendemien tetahos onom enges, nousiltei rendemien onak.
15Nahi Ahi maen Onesimas valohosai ranuk en avong tamure enges, vasakini navong muris, kilea vato vatal minuk lisenges. 16Ka kosa, kei roviteis eisisil tai onom. !Vuo! Kei tahos muli eisisil tai, kei vi more tumali. Inau ekvati, ka keik, emhehati mok, veni kei vi eisisil onom ka tumali emun en isen Asuv Iesu.
17Sakini, munak komundemi kovit lomum onen Asuv tai, kikur revi suval koa kokur revi nau. 18Munak kei mumon tounah tisa minuk, vuo mumon kaon minuk, nihul lati. 19!Kilesi! Nitis ekek en hek:Inau Pol, nihul lat tounah koa mul en kaon onen Onesimas. (Ka emnavobongentei kaon onom venau, veni keik kokur moulien hau ranau.) 20Tuak onak eli, ekvati mok kumon asa koa navisuk eni veni lomusil Iesu Kristo. Hesakin tinok hehilelau en sien.
21Navong namutis selusien koanik, nakilea li mok kumoni hesuval koa navisi. Anatin, nakilea kumoni helohli mok. 22Ekvati mahisuk en tounah tamun: kisak mesen out etai en teim som venau nito ien. Ven koa nakur anatinien navit Ahi houmon aneite ten hisien onami hekistal, keke nimea ran eim takeih nito ris hetal min kami.
Selusien Ekor Onen Pol
23Epapras, koa ro en eim takeih ral minau ven isen Iesu Kristo, mul viten 'more' minuk. 24Ka Mak, Aristakas, Dimas ka Luk emun, koa lumum en out ekok ral minau, keitel emun, telviten 'more' minuk.25Navisi keke more envatien onen Asuv Iesu Kristo heto ven kami vasi.
Copyright information for
PMA